Missing Filemon
Gikan sa Wikipedia, ang gawasnong ensiklopedya
Ang Missing Filemon maoy usa sa mga nag-una sa BisRock ug mitabang aron mabanhaw ang nalubong natong tradisyon sa natad sa musika. Kining bandaha usa sa giidolo diha sa komunidad nga BisRock.
Mga sulod |
[usba] Kasugiran sa grupo
Sa wala pa sila mosikat, subidahon kaayo ang agianan nga ilang gisubay. Daghan kaayo ang mga hagit nga ilang gidawat ug gisagubang aron lang molampos sila sa ilang katuyoan. Nag-agi silag daghang pagsulay. Nakasinati silag daghang kakulian sa sinugdanan tungod kay ang katawhan wala man dayon makasagop sa kalidad sa musika nga ilang gipakigbisogan nga mabanhaw ug molambo pagbalik, ang musikang Bisaya. Ang Missing Filemon pormal nga naorganisar ug natukod niadtong tuig 2003.
[usba] Kaagi sa ngalan sa banda
Adunay lig-on kaayong hinungdan ang grupo kon ngano nga Missing Filemon ang gibunyag nilang ngalan sa ilang banda. Ang "Filemon" kinuha nila gikan sa tudling sa kantang Binisaya nga "Si Filemon… namasol sa kadagatan…" Kining maong kanta popular kaayo kaniadto apan karon pipila na lang tingali ang nakahinumdom. Gipili sa grupo ang maong kanta sa pagrepresentar sa usa ka panahon sa kasaysayan sa Sugbo, kanus-a ang katawhan mahinangpong misagop ug mikanta sa mga awit nga Sugboanon. Kadtong panahon nga ang mga Sugboanon mahiligon pa sa Binisaya nga mga awit ug wala pa nila ikaulaw ang paglitok ug pagkanta sa mga awit nga tinagik sa lumad nga pinulongan.
Sanglit mga batan-on pa man ang mga personahe nga naglangkob sa bandang Missing Filemon, dayag na lang nga ang ilang henerasyon wala makaabot niadtong maong panahon. Nalaktawan nila ang maong kasinatian kay sa bag-ong henerasyon, ang Binisaya nahisama man sa barkong karaan nga nag-anam og kaunlod.
Sa pagkatukod sa Missing Filemon niadtong 2003, lahi ang impresyon sa katawhan mahitungod sa mga kantang Binisaya. Giisip na sa kadaghanan nga "mais" ug "badoy" ang pagkanta og Binisaya ilabi na gayod sa rock genre.
Kini ang hinungdan nga ang upat ka musikero gimingaw ni Filemon. Gihandom nila si Filemon. Gihandom nila kadtong panahon nga ang kantang “Si Filemon… namasol sa kadagatan…” ingon sa giuran-uran ra sa baba sa katawhan. Sila (mga sakop sa banda) truly, madly, deeply do are missing Filemon.
Mao nga gipili nila isip ngalan sa ilang banda ang Missing Filemon aron pagpakita nga may tumong sila sa pagtukod sa maong grupo. Gusto nilang balikan kadtong panahon sa kasaysayan sa Sugbo kanus-a ang musikang Binisaya gihigugma ug gimahal pag-ayo sa katawhang Bisaya, ilabi na gayod sa mga batan-on.
[usba] Inspirasyon
Ang gihimo nilang inspirasyon sa paghukom nga mosulat og mga rock song nga Binisaya mao ang kahiamgo nila sa kakulang niining maong matang sa musika diha sa local band scene. Kay niadtong panahon nga nagsugod pa lang ang Missing Filemon, wala pa mosikat ang mga awit nga Bisrock. Nihit pa usab kaayo ang mga awit nga BisRock niadtong panahona. Aron molagsik ang rock songs diha sa lokal nag mga banda, ang Missing Filemon mitagik og mga kanta sa samang genre.
Usa pod sa nakadugang sa pagdangilag og kadasig kanila mao si Max Surban. Alang nila, usa ka dakong impluwensya sa musikang Binisaya ang nahisgotang mag-aawit.
[usba] Mga hagit nga ilang giatubang kaniadto
Ang labing dakong hagit alang sa Missing Filemon sa panahon sa ilang pagsugod mao ang pagpangitag paagi nga mauyonan sila sa publiko. Ang mga sakop sa maong banda aware kaayo nga ang kadaghanan sa katawhan wala na maghatag og bili sa pinulongang Binisaya. Nasinati nila ang kalisod sa pagpaninguha nga mahiduol sila ngadto sa dughan sa mga tawong naglitok unta sa pinulongang Binisaya apan alang nila badoy na ang maong lengguwahe. Mao nga naglisod sila sa pagpangitag paagi kon unsaon aron madawat sila ug ang ilang mga kanta sa publiko.
Niadtong panahona, lisod pa usab kaayo ang pag-atraka sa lokal nga mga estasyon sa radyo sa Sugbo, partikular na ang mga music station. Maoy gikahiligan ug gipalabi sa mga estasyon sa radyo kaniadto ang mga kantang tinagik sa pinulongang Iningles ug Tinagalog. Mao nga naglisod gayod sila sa sinugdanan sa pagpalusot sa ilang komposisyon nga Binisaya aron kini ikapatugtog sa kahanginan.
Maayo gani kay miabot ang panahon nga adunay usa ka FM station sa Sugbo nga maoy naghatag og kahigayonan sa Binisayang mga komposisyon. Didto nagsugod nga ingon sa nag-anam og kahapsay ang dagan sa panulat sa kantang Binisaya ug nag-anam usab kadaghan ang natakdan sa kaikag sa pagsagop sa awit nga Bisrock.
Sa unang pagtugtog sa Missing Filemon sa ilang mga kanta ngadto sa publiko niadtong tuig 2003 ug 2004, ilang nasinati ug gibati nga makapahiubos kaayo ang reaksiyon sa mga tawo. Bugnaw kaayo ang pagdawat sa katawhan sa bandang Bisrock. Kay lagi “badoy” pa ang mga kantang Binisaya. Apan nakalahutay ang Missing Filemon sa maong pakigbisog.
Ang lain pang discouragement nga nasinati sa Missing Filemon mao ang pipila ka personahe nga nagtrabaho sa medya nga nagpuga og liso sa pagkabahin-bahin tali sa mga Bisrock nga banda pinaagi sa pagpakaylap og intriga ug tsismis nga posibleng makamugnag negatibong epekto sa Bisrock community. Nahisagmuyo ang Missing Filemon sa gihimo niining maong taga media kinsa nangangkon nga mitabang sila sa pag-promote sa BisRock apan sa hilom nga paagi gisubmarino nila ang pagpahigayon og mga buhat nga makadaot sa reputasyon sa ubang banda nga wala nila magustohi gumikan sa usa o daghang katarongang personal.
[usba] Mga sakop
- Insoy Niñal-- Si Insoy nakatungha sa kursong AB Philosophy ug English sa San Carlos Seminary College sa Sugbo. Kaliwat og taga Pinamungajan, Sugbo, nagtrabaho siya sa Pamantalaan sa Sun-Star sa Dakbayan sa Sugbo. Isip frontman, siyay nagdala sa labing bug-at nga yugo sa banda. Gawas nga siyay bokalista ug sa samang higayon, mogunit og gitara, siya pa gayod ang manunulat sa ilang mga kanta.
- Eimer Tabasa -- Si Eimer maoy gisaligan sa pagdumala sa drums sa banda. Hanas na si Eimer sa drums busa dili lisod alang kaniya ang pagtuman sa iyang gimbuhaton. Residente siya sa Dakbayan sa Talisay ug gradwado sa kursong may kalabotan sa turismo sa nabantog nga Unibersidad sa San Jose-Recoletos (USJ-R).
- Ron Carpio -- Si Ron maoy gitugyanan sa paggunit sa bass guitar sa Missing Filemon. Taga Dakbayan sa Mandaue si Ron ug nagtungha sa Cebu Institure of Technology (CIT).
- Cocoy Hermoso -- Laing gitarista sa grupo si Cocoy. Dili usab basta-basta ang gibatonan niyang abilidad sa paggunit og guitar. Taga Dakbayan sa Talisay, Sugbo siya. Gradwado na sa kursong engineering sa University of San Carlos (USC). Bisan propesyonal na, gi-pursue gihapon niya ang iyang hilig sa musika.